Llogaria rrjedhëse është një llogari bazë që përdoret për të vendosur marrëdhënie me Bankën, përmes së cilës do t'ju jepet akses në të gjitha shërbimet tona. Nga kjo llogari, ju mund të merrni ose të dërgoni fondet tuaja dhe të keni akses në të 24/7. Llogarinë rrjedhëse duhet ta përdorni vetëm për arsye personale dhe vetëm për qëllime legjitime. Nëse nuk e përdorni llogarinë tuaj për një periudhë prej 6 (gjashtë) muajsh rresht pa ndërprerje, Banka rezervon të drejtën e mbylljes së llogarisë suaj. Nëse keni ndonjë borxh të papaguar ndaj Bankës në cilëndo nga llogaritë tuaja, Banka ka të drejtën e përdorimit për qëllim garancie të çfarëdolloj shume në ato llogari dhe ju jeni dakord që Banka të mund t'i bllokojë ose t'i mbajë ato shuma dhe t'i përdorë/debitojë llogaritë tuaja për të shlyer borxhin tuaj.

Llogaria juaj e kursimit duhet të përdoret vetëm për kursime dhe nuk mund të përdoret për transaksione rutinë. Interesi nominal është normë e thjeshtë vjetore fikse prej 0,8% në vit në lekë, 0,2% në vit në euro dhe 0,5% në vit në USD, e cila llogaritet në bazë të principalit.

Norma e interesit llogaritet në përputhje me kërkesat e Rregullores së Bankës së Shqipërisë për Transparencën e Produkteve dhe Shërbimeve Bankare. Tatimi mbi të Ardhurat nga Interesat në Shqipëri është 15%. Ai mbahet në burim në momentin e kapitalizimit të interesit.

Karta e debitit lëshohet për një periudhë të caktuar kohore (shkruar me reliev në kartë) dhe lidhet me llogarinë tuaj rrjedhëse. Nëse karta e debitit është përdorur rregullisht, Banka mund t'jua rilëshojë kartën automatikisht nëse e konsideron të arsyeshme edhe pa kërkesën tuaj; megjithatë, është përgjegjësia juaj që të dorëzoni sidoqoftë, në kohë (para skadimit të kartës ekzistuese apo për cdo arsye tjetër) kërkesën për lëshimin e një karte të re. Pas skadimit apo zëvendësimit të kartës, karta e re do të lidhet me të njëjtën llogari.  

Banka aplikon disa kufij për shumat maksimale që lejohen për transaksionet me kartat e debitit dhe/ose për një periudhë të caktuar dhe ka të drejtën t'i modifikojë këta kufij dhe ta informojë klientin përmes kanaleve të ndryshme të komunikimit. 

Ju mbani përgjegjësi për mbrojtjen e të dhënave dhe për kartën tuaj të debitit nga keqpërdorimet e mundshme dhe për të gjitha transaksionet e kryera me atë kartë. Në momentin e marrjes së kartës, Banka do t'ju udhëzojë se si ta aktivizoni dhe do t'ju japë kodin PIN të kartës. Banka do t'jua dërgojë kodin përkatës PIN në një zarf të mbyllur ose duke përdorur një tjetër metodë të përshtatshme fizike ose elektronike. Banka do t'ia sigurojë informacionin konfidencial rreth transaksioneve bankare vetëm Klientit personalisht.

Shërbimi i e-banking ju jep mundësi që të hyni elektronikisht dhe të sigurt në llogaritë bankare që mbani apo që jeni të autorizuar të aksesoni me futjen e emrit tuaj të përdoruesit dhe fjalëkalimit (në versionin në kompjuter dhe në telefon celular).

Duke përdorur emrin e përdoruesit, fjalëkalimin personal dhe kodin e sigurisë, mund të shihni, të shkarkoni dhe të printoni pasqyrat e llogarive tuaja dhe të kryeni transaksione të caktuara bankare të përshkruara në manualet e shërbimit e-banking të publikuara në faqen tonë zyrtare: (https://ebanking.procreditbank.com.al/). Për ekzekutimin e disa transaksioneve të tjera, me qëllim që t'ju mbrojmë, ju kërkohet informacion shtesë për të verifikuar identitetin tuaj.

ProCredit Bank ofron një aplikacion mobile Klientëve Privatë që u mundëson menaxhimin e financave të tyre përmes telefonit. Disa nga vecoritë e këtij aplikacioni janë:

Realizimi i transfertave

Bllokimi dhe zhbllokimi i kartave

Menaxhimi i limiteve të kartave

Hapja e depozitave me afat

Rritja e limitit të tërheqjes në ATM (deri në 7 000 EUR)

Për të hyrë në këtë aplikacion, duhet të përdorni emrin e përdoruesit të klientit dhe fjalëkalimin për akses në e-banking.